Industria-enpresetako profil ezberdinetara egokitutako saio desberdinetan aplikazio errealak eta kasu praktikoak landuko dituzte partehartzaileek
Iraurgi Berritzenek, Digitalenturekin elkarlanean industria-enpresentzat diseinatutako lan-saio praktiko bat antolatu du, Adimen Artifizial Sortzailea modu erreal eta aplikatuan erabiltzen ikasteko. Lan-saioa Urola Erdiko industria-enpresetako profesional eta arduradunei zuzenduta dago, beren eguneroko funtzio zehatzetan aplikatu nahi dutenei.
Adimen Artifizial Sortzailea jada ez da etorkizuneko aukera bat: industria-enpresen egungo egoera eraldatzen ari den errealitatea da, eguneroko lanean aplikatzeko aukera ematen duena. Testuinguru horretan, saio honek ikuspegi praktikoa eskainiko du, parte-hartzaileek adibide generikoen ordez beren lan-esparruari lotutako ariketa eta kasu errealekin lan egin dezaten. Horretarako, lan saioa hiru bloketan egituratu da, arlo profesional nagusien arabera.
Goizeko lehen saioa (09:00–11:00) Front-stage: Marketina, Salmentak, Bezeroarentzako Arreta eta Post-salmenta arloei zuzenduta egongo da. Salmentak, bezero-esperientzia eta fidelizazioa lantzea izango dira bloke honen helburuak eta honako eduki hauek landuko dira:
- AA bidez B2B mezu eta edukien sorrera.
- Salmenta–argumentarioak, emailak eta salmenta role-play-ak.
- Bezeroarentzako arreta eta salmenta osteko taldeentzako laguntza.
- Erantzun azkarragoak, koherenteagoak eta berrerabilgarriak.
- AA bezeroarekiko harremanean eguneroko kopilotu gisa.
Bigarren blokean (12:00–14:00) Back-stage: Bulego Teknikoa, Ekoizpena, Biltegia eta Kalitate arloetako profesionalei zuzendutako saioa egingo da. Eraginkortasun operatiboa eta prozesuen hobekuntza izango dira helburuak, eta landuko diren edukiak berriz honakoak:
- Dokumentazio teknikoarekin eta espezifikazioekin elkarreragina.
- Ekoizpen eta prozesu operatiboetan laguntza.
- Inbentarioen eta lan-fluxuen optimizazioa.
- Erabaki tekniko eta kalitatekoetarako laguntza.
- Industria-ingurunera aplikatutako kasu errealak.
Arratsaldeko saioa (15:00-17:00) Estrategia: zuzendaritza eta kudeaketa arloetara bideratuko da: Zuzendaritza Nagusia, Finantzak, Erosketak eta Berrikuntza. Bloke honetan irizpidea, lehentasunak eta etorkizuneko ikuspegia landuko dira ondorengo edukiaren bitartez:
- AA sortzailea analisi estrategikorako eta erabakiak hartzeko.
- Negozio-aukeren eta eszenarioen esplorazioa.
- Erosketetan laguntza eta alternatiben ebaluazioa.
- Hobekuntza eta hazkunde palankak identifikatzea.
- Ikuspegi globala eta arloen arteko lotura.
Parte-hartzaileek bloke bakoitzerako berariaz diseinatutako prompt-en inbentario bat jasoko dute (rola, testuingurua, sarrerako datuak, zeregina, espero den irteera eta murrizketak barne).
*Jardunaldian zehar ariketa praktikoak egingo direnez, parte-hartzaile bakoitzak bere ordenagailua ekarri beharko du.
Lan-saio hau Iraurgi Berritzenek eskualdeko industria-enpresen trantsizio teknologiko-digitala bultzatzeko duen estrategiaren baitan kokatzen da. Agentziaren helburua da ETE industrialei tresna praktiko eta aplikagarriak eskaintzea, lehiakortasuna handitu eta eraldaketa-prozesuei modu eraginkorrean aurre egin diezaieten.
