Azken bi ikasturteetan, covid-19 osasun pandemia tarteko izan den etenaldiaren ondoren, “Urola Erdiko Zientzia eta Teknologia Azoka”-ren laugarren edizioa ospatuko da Ekainak 15 asteazkenean, Azpeitiko Plazan. Bertan, eskualdeko ikasleek ikasturtean zehar DBH eta Batxiler mailan landu dituzten STEAM proiektuak aurkeztu eta erakutsiko dituzte.
Azokan, honako proiektuen partaidetza aurreikusten da: “Ibaien Ekologia – Biologia”, “Harraldeko Ikerketa – Biologia”, “Ezkutuko Azukreen Bila! – Kimika”, “EkiMaker Aurkiteitor – Teknologia”, “Bizilagun Mikroskopikoak – Biologia”, “Zero Zabor – Zientzia”, “Zubiak Eraiki – Teknologia”, “Arduino Proiektuak – Teknologia”, “Baratza Adimentsua – Teknologia”, “Txanpuen Kimika – Laborategi Teknikak” eta “Tuk Tuk-a – Teknologia”.
Iraurgi Berritzen, Urola Erdiko Garapen eta Berrikuntza Agentziak eskualdeko eragileen partehartzea nahiz lankidetza bermatzeko artikulatzen duen eragile sarean kokatzen da ekimena. Zehazki, “IB Sarea” lankidetza sarearen baitan egituratzen den Hezkuntza Gunean du jatorria eta eskualdeko 5 ikastetxeek -Azkoitia BHI, Floreaga Salestar Ikastetxea, Iraurgi Ikastetxea, Azpeitiko Ikastola Ikasberri eta Urola Ikastola- hartuko dute parte bertan.
“STEAM Urola Erdian” proiektua 2016/17 ikasturtean jarri zen abian eta bere helburu nagusia, zientzia eta teknologia proiektuen garapenaren bitartez, eskualdeko gaztetxoen artean zientzia eta teknologia zaletasunak nahiz gaitasunak lantzea da.
Proiektuaren garapenean zehar, irakasleek zientzia eta teknologia arloan proiektuen garapenerako prestakuntza eta tutorizazioa jaso dute Elhuyarren eskutik. Era berean, ikasle eta arlo ezberdinetako profesionalen arteko harremanak sustatzeko ahaleginak egin dira. Hainbat profesionalek hartu du parte prozesuan zehar eta ikasleek oro har profesionalekin izandako harremanaren balorazioa oso positiboa izan da.
