Iraurgi Berritzenen Enplegu Arloa, Urola Erdian langabezia murriztu eta enplegua sustatzeko helburuarekin azken urtetan profilen arabera ekintza lerro estrategiko desberdinak ari da garatzen eskualdeko eragileekin lankidetzan.
Hauen artean, zaurgarritasun egoeran edo arriskuan aurkitzen diren langabetuei zuzenduriko “Urola Erdian ElkarEkinez UE3” proiektua aurkitzen da. Honen helburu nagusia zailtasun egoerak dituzten pertsona langabetuei gizarteratzeko eta laneratzeko ibilbide egokituak eta eraginkorrak eskaintzea da, horretarako eskualde mailako zerbitzuak integratuz.
Helburu honekin, proiektuak eskualdeko eragile arteko elkarlana sustatzen du: Azpeitia, Azkoitia eta Zestoako Udaletako Gizarte Zerbitzuak, enpresak, eta prestakuntza eta laneratze-gizarteratzeko eragileak: Lanbide, Izarraitz Lanbide Heziketa, Zabaltzen Sartu, Gureak, Katealegaia, KZ, Gazte Bulegoa, Caritas, ElkarEkin, Loiola Zentroa, Kalexka.
Ildo honetan, Gipuzkoako Foru Aldundiaren ElkarEkin estrategiaren markoan, Iraurgi Berritzen-ek aurkeztu duen 150.000€ko diru laguntza eskaera onartua izan da, Urola Erdian formakuntza ikastaroak antolatu eta enplegu inklusiboa sustatzeko enpresekin elkarlanean.
Proiektu honek, eskualdeko 100 pertsona langabetuen laneratzeko ibilbideak ahalbideratuko ditu datozen hilabateetan, konpetentzia teknikoak, oinarrizkoak eta lanbide ziurtagiriak lortzera bideraturiko 9 ikastaroen bitartez eta enpresen partehartzea sustatzeko ekintzen bitartez.
