Atzo, Iraurgi Berritzenek ETE Digitala lan-taldearen saio berri bat ospatu zuen Azpeitiko Basazabal Jauregian. Gipuzkoako Foru Aldundiak sustatutako ekimen honek enpresa txiki eta ertainak beren eraldaketa digitaleko prozesuetan laguntzea du helburu.
Saio honetan, eskualdeko garapen eta berrikuntza agentzia ezberdinak, Gipuzkoako Foru Aldundia, Innobasque eta Orkestra elkartu ginen, ezagutza teknikoa, eskualdeko ikuspegi estrategikoa eta enpresen benetako esperientziak uztartu zituen programaren bueltan.
Jardunaldia Iulen Ibañezen hitzaldiarekin hasi zen, negozioari lotutako datuen analitika eta bistaratzean aditua dena. Bere ekarpenean, datuen analisiak eta bistaratzeak ETEen erabaki-hartzean duen garrantzia azpimarratu zuen, kudeaketa eredu informatuago eta eraginkorragoetara nola aurreratu hausnartzeko eta eztabaidatzeko espazioa sortuz.
Ondoren, Iraurgi Berritzenek eta Urola Kostak eskualdean digitalizazioaren arloan garatzen ari den estrategia aurkeztu zuten. Ikuspegi honek bi eskualdeetako enpresa-ehunaren egungo egoera testuinguruan kokatzeko eta lehiakortasuna sustatzeko martxan dauden ekimenak ezagutzeko aukera eman zuen.
Saioan protagonismo berezia izan zuten enpresen esperientziek, inguruko bi industria-enpresaren parte-hartzeari esker —Calderería CPK eta Engranajes Juaristi—. Enpresek beren eraldaketa digitaleko ibilbidea partekatu zuten, baita ETE Digitala prozesuan parte hartzeak ekarri diena, jasotako laguntzari esker lortutako aurrerapenak eta beren ibilbide-orrian aurreikusitako hurrengo urratsak ere.
Tailerra ETE Digitala prozesuaren jarraipenarekin amaitu zen, parte hartzen duten erakundeen aldetik ETEei eraldaketa digitalean laguntzeko konpromisoa indartuz.
Halako topaketek erakusten dute erakundeen, eskualdeko eragileen eta enpresen arteko lankidetzaren balioa, ETEak lurraldeko digitalizazio estrategiaren erdigunean kokatuz.
Parte-hartzaileak: Gipuzkoako Foru Aldundia (Jon Gurrutxaga, Loreto Susperregi, Eider Sarasola); Innobasque (Luis Manero); Orkestra (Maddalen Alkoorta eta Aitziber Elola); Iraurgi Berritzen; Urola Kosta; Uggasa; Goieki; Tolosaldea; Debegesa; Oarsoaldea; Bidasoa Activa; Debagoiena; Beterri Buruntza; Calderería CPK (Ane Iriondo); Engranajes Juaristi (Jokin Juaristi).
