“Fabrikazio Mekanizatuko Eragiketa Osagarriak” lanbide-ziurtagiria eskainiko da irailetik abendura bitartean, eskualdeko industriaren beharretara egokitutako prestakuntza eta enpresetako praktikak uztartuz.
Iraurgi Berritzenek, Sutargirekin, Urola Kostako Urola Erdiko Mankomunitatearekin eta Izarraitz Lanbide Heziketarekin elkarlanean, UE Inklusivity proiektuaren baitan industria sektorean lan egiteko interesa duten emakumeei zuzendutako prestakuntza-ibilbide berri bat jarriko du martxan datorren irailean. Proiektua, Eusko Jaurlaritzaren Industria Saila eta Lanbide-ren babesarekin garatuko da.
Ekimenaren helburua da eskualdeko industriaren beharrei erantzuten dien prestakuntza espezializatua eskaintzea, emakumeak industria sektoreko lan-aukeretara hurbiltzeko eta euren enplegagarritasuna indartzeko. Horretarako, Sutargik garatutako metodologia berritzailea erabiliko da, prestakuntza teorikoa, gaitasun profesionalen garapena eta enpresekin lankidetza uztartuz.
Prestakuntza-programaren ardatza “Fabrikazio Mekanizatuko Eragiketa Osagarriak” lanbide-ziurtagiria izango da. Guztira 400 orduko iraupena izango du eta Izarraitz Lanbide Heziketan eskainiko da, 2026ko irailetik abendura bitartean.
Ikastaroan parte hartzen duten pertsonek, prestakuntza teknikoaz gain, ekonomia zirkularrarekin lotutako eduki espezifikoak ere landuko dituzte, hala nola birziklapena, hondakinen kudeaketa eta baliabideen erabilera jasangarria. Horrez gain, programak 40 orduko praktikaldia aurreikusten du eskualdeko industria-enpresetan, benetako lan-ingurunean esperientzia eskuratzeko eta enpresek planteatutako erronkei erantzuteko.
Prestakuntza langabezian dauden edo beren lanbide-ibilbidea industria sektorera bideratu nahi duten emakumeei zuzenduta dago. Parte hartu ahal izateko, industria arloan lan egiteko interesa izatea, oinarrizko prestakuntza edukitzea eta arratsaldez aritzeko erabilgarritasuna izatea eskatzen da. Parte-hartzaileek, gainera, eguneko beka jasoko dute ikastaroan parte hartzen duten bitartean.
UE Inklusivity proiektuaren bidez, Iraurgi Berritzenek eta gainerako erakunde laguntzaileek industria sektorean emakumeen presentzia handitzen lagundu nahi dute, eskualdeko enpresen talentu-beharrei erantzunez eta aukera-berdintasuna sustatuz.
Prestakuntzan parte hartu nahi duten pertsonek edo informazio gehiago eskuratu nahi dutenek Sandra Fernándezekin jar daitezke harremanetan, sfernandez@iraurgiberritzen.eus helbidean edo 688 87 35 89 telefonoan.
