Gipuzkoako 700 profesional baino gehiago bildu dituen kongresuan, eskualdeko bi enpresek talentuaren kudeaketaren eta berrikuntza teknologikoaren inguruko mahai-inguruetan parte hartu dute.
Urriaren 21ean Donostian ospatutako Re-Think Industry kongresuaren bosgarren edizioak 700 profesional baino gehiago elkartu ditu, Gipuzkoako industriaren etorkizuneko erronkak eta aukerak aztertzeko. Jardunaldian, Urola Erdiko Alberdi Mekanizatu Lanak eta ERLO Taldea enpresek parte hartu dute, talentuaren kudeaketaren eta berrikuntza teknologikoaren inguruko esperientziak partekatuz.
Gipuzkoako Foru Aldundiak antolatutako topaketak egungo testuinguru ekonomiko, geopolitiko eta teknologikoak industria-enpresen lehiakortasunean duen eragina izan du aztergai. Era berean, enpresen, erakundeen eta eragile ekonomiko eta teknologikoen arteko lankidetza indartzearen garrantzia azpimarratu da.
Urola Erdiko bi enpresa, talentuaren eta berrikuntza teknologikoaren inguruko mahai-inguruetan
Jardunaldiko bi mahai-inguru nagusiek Gipuzkoako enpresa txiki eta ertainentzat estrategikoak diren bi erronka izan dituzte ardatz: talentuaren kudeaketa eta berrikuntza teknologikoa.
Aitzol Alberdik, Alberdi Mekanizatu Lanak enpresako koordinatzaile nagusiak, talentuaren kudeaketa eta erakarpenari buruzko mahai-inguruan parte hartu du. Bertan, aldaketa demografikoak, profil profesionalen bilakaerak eta enpresen behar berriek planteatzen dituzten erronkak aztertu dituzte, Bexen Medical, Smartlog eta SmartPM enpresetako ordezkariekin batera.
Bestalde, Unai Zubeldiak, ERLO Taldeko zuzendari komertzialak, berrikuntza teknologikoari buruzko mahai-inguruan parte hartu du. Saioan, teknologia berriek enpresa txiki eta ertainetan duten aplikazio praktikoa landu dute, prozesuak hobetzeko, negozio-eredu berriak garatzeko eta lehiakortasuna indartzeko eskaintzen dituzten aukerak aztertuz. Mahai-inguruan Ariona Pools, IngeSEA eta BRTAko ordezkariek ere parte hartu dute.
Bi enpresen parte-hartzeak Urola Erdiko industria-enpresek Gipuzkoako industriaren etorkizuneko erronken inguruko hausnarketan duten presentzia agerian utzi du.
