Iraurgi Berritzenek bultzatutako IkasEkin prozesuaren bidez, enpresa partertzaileek ingurumen-aztarna neurtu, hobekuntza-aukerak identifikatu eta lehiakortasuna indartzeko bide-orri pertsonalizatua garatuko dute.
Ekainaren 18an eman zitzaion hasiera Iraurgi Berritzen-etik martxan jarri dugun AZTARNA proiektuari, Urola Erdiko industria-ehuna osatzen duten enpresak ingurumen- eta trantsizio ekologikoan laguntzea helburu duen ekimenari. Gaur egin da lehenengo lan-saioa, eta datozen hilabeteetan eskualdeko lau enpresarekin garatuko da proiektua.
Ekimenaren helburua da enpresen ingurumen-aztarna aztertzea, eta horren gainean, energia-eraginkortasuna hobetzeko, karbono-isuriak murrizteko eta energia berriztagarrien erabilera sustatzeko neurriak identifikatzea, besteak beste.
Proiektuak hainbat fase izango ditu: sentsibilizazio- eta prestakuntza-saioak, datu-bilketa eta diagnostikoa, ingurumen- eta karbono-aztarnaren kalkulua, hobekuntza-neurrien identifikazioa eta azkenik, enpresa bakoitzarentzako ekintza-plana edo bide-orria.
Era berean, proiektuak enpresen arteko esperientzia-trukea eta jardunbide egokien partekatzea sustatuko ditu, eskualdeko industria-sarearen lehiakortasuna eta jasangarritasuna indartzeko.
AZTARNA Gipuzkoako Foru Aldundiaren laguntzarekin finantzatutako ekimena da, eta Iraurgi Berritzenek sustatzen du, eskualdeko enpresei trantsizio ekologikoan, energetikoan eta deskarbonizazioan laguntzeko helburuarekin.
